ගින්නක් නොමැතිව ගෑස් කාන්දු වීමක් සිදුවුවහොත් ඔබ වහා ක්‍රියාත්මක විය යුතු ආකාරය.

වර්තමානය වන විට බොහෝ පිරිසක් ගෑස් භාවිතා කිරීමට නැඹුරු වී සිටිනවා. මේ ප්‍රවණතාවය නිසාම ගෘහස්ථ ගෑස් පරිභෝජනයේදී ආරක්ෂාකාරීව එය භාවිතා කරන ආකාරය පිළිබඳවත් දැනුවත් විය යුතුයි.

සාමාන්‍යයෙන් ගින්නක් සහිතව ගෑස් කාන්දුවීමක් සිදුවන අවස්ථාවකට වඩා ගින්නක් නොමැතිව ගෑස් කාන්දු වීමක් සිදු වුවහොත් එම අවස්ථාව අතිශයින් භයානක අවස්ථාවක් ලෙස හඳුන්වා දෙන්න පුළුවන්. මුළුතැන්ගෙයි හෝ ඒ වගේම මුළුතැන්ගෙයින් පිටත වෙනත් ස්ථානයකට ගෑස් කාන්දු වූ ගන්ධයක් දැනේනම් ඔබ වහා ක්‍රියාත්මක විය යුතුයි.

ගිනි ත්‍රිකෝණයට අනුව ගින්නක් ඇතිවීමට ප්‍රධාන සාධක තුනක් අත්‍යවශ්‍යයි. එනම්,

• ඔක්සිජන්
• ඉන්ධනයක්
• ගිනි පුළිඟුවක්

නිවසක ගෑස් කඳුවීමක් සිදුවන අවස්ථාවේදී එය තුළ ඔක්සිජන් සහ ඉන්ධන කියන දෙකම සම්පූර්ණයෙන්ම තිබේ. අවශ්‍ය වන්නේ ගිනි පුළිඟුවක් පමණයි. එම නිසාම ගෑස් කාන්ඳුවීමක් ඇති අවස්ථාවකදී ගිණි පුළිඟුවක් ඇතිවීම වැලක්වීමට ඔබට විවිධ ක්‍රියාමාර්ග ගත හැකියි.

1. ගෑස් කාන්දු වී ඇත්නම් ජංගම දුරකථන භාවිතා කිරීම සම්පූර්ණයෙන්ම තහනම් ජංගම දුරකථනය තුළ ටච් පෑඩය එහෙමත් නැත්නම් බට්න් එකක් භාවිතා කලත් ඒ තුළ ගිනි පුළිගුවක් තිබිය හැකියි. එවිට ගිනි ගැනීම එතැන් පටන් ආරම්භ වේ.
2. විදුලි ස්විච් දැල්වීම හෝ දල්වා ඇති ස්විච් ඕෆ් කිරීම සිදු නොකළ යුතුයි.
3. නිවසේ කුඩා කාන්තාවන්, ගැබිණි මාතාවන් සහ ආබාධිත පුද්ගලයන් ඒ වගේම වැඩිහිටියන් සිටී නම් හැකි ඉක්මනින් ඔවුන් නිවසෙන් පිට කළ යුතුය.
4. ගෑස් කාන්දු වීම සිදුවී ඇති ස්ථානය අවට ඇති කිසිදු වාහනයක් යළි ස්ටාර්ට් කිරීම සිදු නොකළ යුතුය.
5. දොර ජනෙල් ඉතා සෙමින් විවෘත කිරීමෙන් පසුව ගෑස් සිලින්ඩරය සහ රෙගුලේටරය ක්‍රියා විරහිත කළ යුතුය.

මීට අමතරව ගෑස් කාන්දු වීම් වළක්වා ගැනීමට නම් ආහාර පිසීමෙන් අනතුරුව ගෑස් සිලින්ඩරය රෙගුලේටරය ක්‍රියා විරහිත කිරීම සිදුකළ යුතුය.

මෙවැනි ආරක්‍ෂාකාරී පිළිවෙත් අනුගමනය කිරීම මගින් නිවසේදී සිදුවීමට ඉඩකඩ තිබෙන ගෑස් අනතුරු බොහොමයක් වළක්වා ගැනීමට හැකියාව ලැබෙයි.